Margur veit betur

(1 danskur spesíudalur frá 1670)

Það hellist nú yfir Ísland flóðbylgja sérfræðinga sem allir halda að þeir geti með gáfulegum frösum bjargað ástandinu og gert komandi áföll mjúkari fyrir þjóðina. Margir hafa mælt fyrir upptöku EURO fyrir íslenska efnahagslífið sem einskonar töfralausn. Að allt verði betra þá og vandinn hverfi sem dögg fyrir sólu. Þetta fólk er annaðhvort illa grunnhyggið eða afskaplega fálega upplýst.

Hverju stoðar að hvítmála yfir rakaskemmdir á húsvegg?  Innan skamms mun rakinn taka sig í gegnum nýju málninguna og skapa enn meiri vanda. Rekjan á upphaf sitt einhversstaðar og ljóst að koma verður fyrir ástæðu skemmdanna, en ekki reyna að mála yfir vandann. Hann mun alltaf skjóta upp kollinum.

Umræðan um einhverskonar efnahagssamband milli Íslands og annars lands eða fjölþjóðaríkja hefur verið viðloðandi lengi. Þörf fyrir sterka efnahagslegar heildir eða einskonar bakland er skynsamleg. Ísland er í sjálfu sér of lítið í stærra samhengi til að geta verið "berandi" fyrir sjálfsstæða mynteiningu.

Ég legg til, að Ísland tengi Íslensku krónuna þeirri norsku. Að leitast verið við að efnahagstengsl þessara tveggja landa verði styrkt til mikilla muna. Síðar verði Norðurlöndunum hinum gefin kostur á því að selja eigin framleiðslu gegn lágum tollum innan norsk-íslenska efnahagssvæðisins. 

Síðan sláum við fallega mynt þar sem hvort land um sig á sína hlið!  :)

Einhliða upptaka evru óviðeigandi

Vorboði í samskiptum

Í kirkjunni í dag var mér hugsað til hins hræðilega stríðs milli Ísraela og Palestínumanna. Ég minntist orða 73. Saltarsálms en upphafsorð hans eru: "Vissulega er Guð góður við Ísrael, við þá sem hjartahreinir eru."  Já, Guð er góður þeim sem þrá frið, því friðflytjendur eru hans. Mótstöðumenn friðar, er mótstöðumenn Guðs. Þegar hörmungarnar eru yfirstaðnar, munu hjartahreinir og friðelskendur lifa þá von sína um frið. Margir hafa dáið og sennilega munu enn margir láta líf sitt.

Friður er uppspretta góðra hluta, hagsældar og blessunarríks lífs. Sáttin er verkfæri Guðs. Hann réttir hana út sem veldissprota til þess sem vill frið og veit að ekkert gott blómstrar í ófriði, mannfalli og virðingarleysi.  Umburðarlyndi, kærleikur og fyrirgefning eru óskaorðin okkar nú. Minnumst þess sem gefur, líknar, bætir og stýrir til góðs.  Svo er með þá sem hreykjast upp í vonsku sinni, beita vopnum til að öðlast völd yfir löndum og fólki, að þeir eru settir á vogaskálarnir mót hinum góðu. Vonskan ræður fyrir mörgum löndum og þjóðum í dag. En vert er að muna að aðeins með andblæ Drottins lyftist skál hinna vondu og hinir góðu munu með andadrætti Guðs, bera vonskuna ofurliði.

Biðjum fyrir friði, heima og heiman, sátt og fyrirgefningu. Annars munum við aldrei verða þær manneskjur sem við vorum sköpuð að vera.

Lýsa yfir vikulöngu vopnahléi

Svört jörð: nauðyrkja

Stórar alþjóðlegar verslunarkeðjur hafa um árabil staðið í kaupum/legutöku á jarðnæði út um allan heim. Þetta virðist kannski ekki vera neitt til að taka upp hér, en einhvern veginn hafa hugsanir mínar bundist þessum uppkaupum og leigu verslanakeðjanna.

Mig langar að skýra út hér hvað býr að baki vangaveltum mínum. Fyrir nokkru heyrði í útvarpi hér ytra samtal sérfræðings í þróunaraðstoð og þróunaraðstoðaráætlanagerð og umsjónar manns þáttarins. Það reyndar var nokkru síðar að ég áttaði mig á alvarleika þess sem rætt var um í útvarpsþættinum.

Í fjölda ára hafa stórfyrirtæki í matvælaiðnaði staðið í fjárfestingum á landnæði í Suður-Ameríku, Rússlandi, Asíu og sér í lagi Afríku.  Ástæða þessara fjárfestinga og leigutöku jarðnæðis (oft í fátækustu löndunum í hverri álfu) er fyrirsjáanlegur skortur á mat í framtíðinni. Nú hafa t.d. Kínverjar hafið kaup á landnæði í fátækum löndum Afríku. Fyrirsjáanlegur skortur á heppilegu landnæði í Kína fyrir rækt matvæla er þegar fyrir löngu orðinn ljós. Hér eru gerðir ýmist leigusamningar til 90 ára eða land hreinlega keypt á hófsamlegu verði. Ekkert lát er heldur á því að stóru matvælakeðjurnar í Evrópu og Bandaríkjunum standi í svipuðum viðskiptum. Sum þessara fyrirtækja hafa hátæknibúnað til að stýra sáningu og uppskeru sem stýra má með gervihnattabúnaði.

Þessi þróun er skelfileg. Sjálfsþurftarbúskapur sem oft er byggður á aldalangri þekkingu á getu jarðar til að framleiða og endurnýjast hverfur fyrir nauðyrkju og framið er bókstaflega arðrán á gjöfum jarðar. Aukin notkun efna og næringar sem auka á framleiðni breytir jafnvægi náttúrunnar og efnasamsetningar grunnvatns. Vítahringurinn er hafinn. Vatnsból mengast, vatn "drepst" og þegar þessi spilliefni berast til hafs deyr hafið. Fullkomin röskun verður á jafnvægi náttúrunnar og skaðinn er skeður.

Iðnríkin, gróðrarstía velferðarsjúkdóma og spilavítishagkerfis munu í krafti efnahagslegra yfirburða sinna setja ríki þessara landa í ánauð. Í dag þurfa þessi ríki fjármagn og það fljótt.  Skotfenginn gróði án framtíðarsýnar verður reipið um háls sumra Afríkuríkja, Asíulanda og Suður-Ameríkulanda.

Ég hvet Íslendinga að skipa sér í flokk andstæðinga kaupa á svartri jörð. Svo hefur það jarðnæði verið kallað sem keypt eða leigt er til nauðyrkju.

Tragikómík að hætti Geirs Haarde!

Það er litið sorglegt að sjá hvernig Ísland er að hverfa út af korti þeirra sem láta sig viðskipti og efnahagslíf varða í hinum stóra heimi. Það er talað um efnahagslegt eftirsjálfsmorð. Hér á fólk við með því orðinu að íslenska efnahagskerfið var þegar komið að fótum fram. Náðarhöggið reiddi svo ríkisstjórnin á Mikjálsmessu í haust. En einhverjum hefur ekki þótt bitið úr nálinni og rekum kastað svo ríkisstjórn Geirs Haarde ákvað að halda veislunni áfram og berja á sjálfu líkinu, íslensku efnahagslífi. 

Einhvern hefði sagt hér áður fyrr að þetta væri ljótt, illa gert og fólskulegt.  Ég tek undir það!  En þjóðin er sátt, Alþingið er sátt, fjármálastofnanir eru sáttar, Geir og Davíð eru sáttir.  Enginn gerir neitt nema sér lífsandann fjara úr þjóðarvitundinni.  Hvernig má þetta vera. Það koma gjarnan upp sterk orð hér á blogginu sé ég þegar ég les blogg annarra. Fólkið er ýmist hatursfullt, beygt, lamað, úrræðalítið - vonlaust. 

Það setur sorg að hjarta mínu að sjá hvernig ríkisstjórn Geirs Haarde hefur farið illa að ráði sínu. Fallið frá málssókn á hendur Bretum, haldið uppi sýndarvörnum, farið bak við þjóðina og sannarlega brotið niður baráttuþrek þjóðarinnar.  Ég leyfi mér að taka upp gamla lummu sem ég hefi áður rætt hér fyrir margt löngu á blogginu mínu og aðrir hafa byrjað að hreyfa máls við: Utanþingsstjórn. Stjórn sem ekki er setin neinum af þeim sem sitja nú.

Aðrir hafa af hreinum hug nefnt stjórnlagaþing, þjóðstjórn og slíkt. En sá galli er þá á gjöf Njarðar að þá sitja áfram þeir sem leiddu íslensku þjóðina í gröfina. Við verðum að hreinsa út það fólk sem hefur skapað þá óreiðu og ólgusjó sem þjóðarskútan er í. Hún hefur þegar fengið á sig marga brotsjó.  Hún helst ekki lengi á floti ef ekkert róttækt verður að gert.  Þeim aðgerðum sem þörf er á valda ekki Geir Haarde og ríkis"stjórn" hans.   Þannig er það!  Burt með spillingarliðið!

Neita að tryggja Ísland

Ekki gaman að vera Íslendingur

Nú er það svo að gengi íslensku krónunnar hefur ekki verið skráð í rúma fjóra mánuði. Svona leit gengisskráningartaflan út hjá einum gjaldeyrismiðlara á Strikinu í Kaupmannahöfn þann 31.12.2008 kl. 13:35.  EKki gaman að vera Íslendingur.    

 

Vesældómi íslenskra stjórnmálamanna er að þakka þetta. Seðlabanka Íslands, Fjármálaeftirlitinu og Ríkisstjórn (og Alþingi sem vinnur fyrir ríkisstjórnina) kann ég engar þakkir. Mér fannst eins og stolt Íslendingsins hyrfi skyndilega þegar ég sá þetta.

 

Íbúð til sölu skítódýrt

Hef ljómandi bjarta íbúð á fyrstu hæð til sölu á miðju Gaza-svæðinu. Verðið er hagstætt og greiðslukjörin eftir því aðgengileg. Íbúðin er laus til flutnings nú þegar, þar sem íbúarnir eru allir látnir. Íbúðin er björt og staðsett í hringiðu miðbæjarins. Þetta er samt spennandi hverfi og bílastæðamál eru leyst um ókomna framtíð.  Ekki þarf að mála eða hafa áhyggjur af lögnum því engar eru lengur til staðar. Rétt er að skipta um gólfefni þar sem okkur hefur ekki tekist að fjarlægja alveg allar yrjur af fyrri eigendum. Skólprör eru á staðnum, en sennilega full af steypu og öðrum byggingarefnum. Aðkoma er enn erfiðleikum bundin, en með réttum pólitískum tengslum má komast lifandi að húsinu.  Útsýni er gott því öll önnur hús hafa verið sprengd burt. Þannig er þessi íbúð, staðsett miðsvæðis, með fjarska gott útsýni athygliverður kostur fyrir þá sem hafa áhuga á hernaðarsögu, stjórnmálaflækjum og spennandi hversdegi.

Við hjá "Byggt og burtsprengt ehf." hvetjum áhugasama að hafa samband hið fyrsta - eða áður en landtökufólk flykkist á staðinn. 

Íbúðarsýning kl. 12:30-14:30 (vopnahléstími). Verið vel vopnum búin og takið með hugsanlegt tilboð. Engar teikningar eru til af húseigninni. Við fullyrðum að þið verið ekki fyrir sprengjufalli.

Góðar stundir!

Kallað eftir friði

Skömm á skömm ofan

Mér verður hugsað til Davíðs og Golíats! 

Hversvegna, spyr ég á þessum laugardegi, megum við Íslendingar ekki fá einhverja uppreisn æru?  Hversvegna unna ekki íslensk stjórnvöld Íslensku þjóðinni þess að fá eitthvað af stolti sínu til baka? 

Yfir 88.000Íslendingar hafa sett nafn sitt við þá undirskriftasöfnun sem Indefence samtökin hafa beitt sér fyrir. Nú skal því spara aurana og kasta krónunum - vegna þess að íslenska þjóðarstoltið og vitundin er ekki þess virði að mati stjórnarflokkanna að við berjumst fyrir hana.

Peningum sem 200 miljónum króna hefur verið eytt hingað til í veisluhöld, laxveiðiferðir, einkabílaakstur, Kínaferðir, óþarfar ferðir maka ráðuneytisstarfsmanna og svo framvegins. Lengi mætti telja!  Kunna margir fróðlegar tölur í þessu sambandi.  Af hverju unna ekki stjórnmálamenn Íslensku þjóðinni þess að sigra Golíat! Hvílíkur móralskur sigur yrði þetta ekki?  

Kveðja frá stoltum Íslendingi í útlöndum!

Stjórnvöld spara aura en kasta krónum

Tala sem á eftir að stíga

Það sem Íslendingar héldu vera stóráfall á árinu 2008 var einungis byrjunin á skriðu gjaldþrota fólks og fyrirtækja. Enn á ný virðist sem auðtrúa Íslendingarnir hafi haldið að allt yrði betra eftir áramótin og þetta hefði bara verið sem vondur draumur. "En núna er Pamela vöknuð og Bobby er ekki kominn til baka."  Ég held að það sé kominn tími til að fólk átti sig á afleiðingum þess að biðja IMF um fyrirgreiðslu. Vextir hafa snarhækkað, ungt fólk á eftir að tapa húseignum sínum í hundraðavís og fyrirtækin stóru og smáu, munu enn fleiri gefast upp fyrir lækkun kaupmáttar fólks, fátækt og aukinni misskiptingu í samfélaginu. Hinir fátæku verða fátækari, meðan aðrir frá ofurlaun.  Ljót sýn, en svona er þetta. Hættum að gefa fólki hálfan sannleikan, það er best að taka þetta út nú þegar!

3.500 fyrirtæki í þrot?

Húsleit hjá stjórnmálaflokkum

Ég er á því að gera eigi húsleit hjá ÖLLUM stjórnmálaflokkum!  Bankaráðum, Fjármálaeftirliti og Seðlabanka. Þjóðin vill gjarnan vita meira hvað fór úrskeiðis. Og að allt verði grandskoðað og síðan birt opinberlega. Já - við viljum meiri upplýsingar.

Húsleit hjá Teymi

Verdun-sur-Meuse 1916

 Verdun-sur-Meuse  1916

Árið 1916 börðust Frakkar og Bretar mót sterku liði Þjóðverja við litla bæinn Verdun-sur-Meuse. Þessar þjóðir börðumst af öllu afli og engu var til sparað til að framgangur þjóðanna yrði sem bestur; sóknarstríð Þjóðverja gegn varnarstríði Frakka og Breta. Í þessari orrustu sem stóð frá 21. febrúar til 18. desember létust (að talið er) yfir 300 000 hermenn. Afrakstur þessarar viðbjóðslegu var enginn. Þegar uppi var staðið hafði ekki einn metir unnist. 300 000 menn höfðu látist og um 500 000 voru særðir (margir örkumlaðir). Sálarmein þeirra sem lifðu og sorg aðstandenda er ólýsanleg.

Ekkert vannst!

Í dag er barist hér og þar um allan heiminn. Skæruhernaður er daglegt brauð í öllum heimsálfum nema á Suðurskautslandinu. Eyjaálfa fékk að kenna á sprengingum fyrir nokkrum árum, barist er enn um yfirráð og fyrir mannréttindum á Kaldóníu. Asía líður á mörgum stöðum. Opin sár hefur hún í Kambódíu, Laos, Norður-Kóreu, Sri-Lanka, Indlandi/Pakistan, Tíbet, Afganistan, Georgíu, Írak, Armeníu... og Asíuhluta Rússlands. Suður-Ameríka er ekki laus við þessi illalyktandi kýli mannvonsku og baráttu fíkniefnabaróna og erindreka dauðans. Fátæktin er voðalega í mörgum ríkjum þessarar álfu og lítur maður norður á bóginn flýr fólk enn yfir landamærin til Bandaríkjanna frá Mexíkó og frá ríkjum Vestur-Indía. Flótti frá fátækt, þvingunum, óöryggi og martraða á vökutíma. Bandaríkin eru sjálf í óbeinum hernaði hér og þar um alla jörðina. Sumstaðar er vopnum beitt, annars staðar er dollurum beitt með sömu niðurstöðu. Afríka, já - Afríka. Þangað þarf ekki að senda herlið.  AIDS og malaría fellir hundruð á hverjum degi. Hungur og sjúkdómar aðrir drepa hina. Þeir fáu sem rekist hafa á peningasendingar frá ríkum þjóðum heimsins, sækjast eftir völdum með vopnavaldi og upphefja mismunum og ójöfnuð meðal sinna. Arabalöndin eru sér sjálf sundurþykk. Shítar og súnnítar skilja ekki hvora aðra en sameinast í hatrinu mót Gyðingum og Ísrael. Evrópa stendur víða bak við hrærigrautinn í nálægum löndum, þykist vera hjálpa en dauðskammast sín fyrir undangengnar aldir, nýlenduvæðingu og viðskilnaðinn við þessar þjáðu þjóðir sínar, sem nú vilja bara vera taldar til þjóðanna og vera virtar fyrir það sem ekki tókst að eyðileggja eða breyta til óþekkju.  Evrópa vonar að allir séu búnir að gleyma og segir bara: "Evrópubandalagið er lausn alls vanda: eigum við ekki bara horfa fram á við".  Svo einfalt er þetta bara ekki allt.  Og ekki hafa allir gleymt.  Enn eru börn og barnabörn hermannanna sem stríddu og örkumluðust eða dóu við Verdun að minnast þessa viðbjóðslega fórnakastar - já fórnarkastar hvers?  Ég veit það ekki. Hreinlega veit það ekki.

 

Tilgangslaus morð, ótti, rótleysi, hatur, ofstopi, þjáningar og árásir. Heimurinn horfir á sem hann væri að horfa á hanaslag eða hundaat. Allir bíða átekta og engir vilja fá blóðið á sig sem spýtist í allar áttir og yrjast á alla sem standa of nærri. Þetta er harmleikur margra þjóða. Margar þjóðir eiga hlut að máli, en forðast alla ábyrgð. Allir bíða átekta og vilja ekki blanda sér of djúpt í ágreiningsmálin því það gæti sannarlega velt við steinum sem ekki má velta. Þjóðir heims eru sannarlega ekki tilbúnar að setja sig í siðferðisumræðu nútímans - ekkert frekar en þær sýndu snilli sína fyrr á tímum í þeim málum.  Sá sem stendur hjá og horfir á, hefur krafta og afl að skilja deilendur - en gerir það ekki: Er sannarlega þáttakandi og ábyrgur.  Þannig er það, þannig hefur það alltaf verið - þegar það hefur passað þessum þjóðum. Það passaði sameinuðu þjóðunum SÞ að fara inn á Balkanskagann. Það hentar ekki þjóðum heims að bregðast við Ísrael/Palestínu deilunum.

Þetta er svo ljótt, svo ljótt. Hversu lengi á fólk að líða?  "Hversu lengi, ó Guð" (eins og sálmaskáldið í Davíðsálmunum segir svo oft)

12 úr sömu fjölskyldu létust