Bravó herra Ólafur

Það er ljóst að þá er embættismenn, alþingismenn og aðrir starfsmenn þjóðarinnar ekki standa sig eða hreinlega eru ekki nægilega skýrmæltir á alþjóða vettvangi, verðum við að treysta öðrum til verksins.   Því er eðlilegt að sá sem stjórnmálaþekkinguna hefur og er nægilega skýrmæltur geri það sem hann getur: Herra Ólafur Ragnar, forseti Íslands

Við höfum fá góð spil á höndum. Staða okkar er afskaplega bág.  Því er brýnt að spilað sé rétt út þeim spilum sem við þó höfum og herra Ólafur Ragnar gerir einmitt það núna.  Hann sér að það er verið að svelta okkur í fjármálaumsátri fyrrum vinaþjóða okkar. Umsátrið hefur staðið nógu lengi svo að þjóðin ætti að skilja að þessum umsátursher er alvara.  Að við sendum út bréfdúfu með skilaboð til fjarlægra vina um að koma og aðstoða okkur, er rétt, skylt og okkar eina von.

Látum því bullið í Evrópubandalaginu sem er núna að nota þumalskrúfurnar á okkur lönd og leið og leitum aðstoðar hjá Rússum, Kínverjum og hverjum þeim sem vill liðsinna okkur.  Það er vont val til vina.

Mikið fjallað um ummæli forsetans

Sjúkt dæmi um spillingu - í Svíþjóð

Í sérstökum eftirlaunasamningi sínum við Nordea bankann, hefur Thorleif Krarup (56) tryggt góða fjármálaframtíð.  Hann er 56 ára og hefur starfað sem stjórnarmaður í Nordea bankanum í Stokkhólmi í eitt og hálft ár. Hann mun halda hálfum launum þar til hann verður 62 ára og eftir það fær hann 60% núverandi launa þar til að hann deyr. Eftirlaunasamningur hans er því metinn á minnst 150 milljónir sænskra króna eða um 2.562.000.000 (við tölum yfir 2 milljarða hér).

Nordea hefur staðfest þessar tölur.

Þetta er hreinn og klár viðbjóður.  Nú sit ég hér og hugsa hvort búið sé að gera svona eftirlaunasamninga við einhvern af bankastjórunum eða bankaráðsmönnunum heima á Íslandi.  Nennir ekki einhver að kanna það? 

http://www.dn.se/DNet/jsp/polopoly.jsp?d=3130&a=850740

Valgerður sár! Hún slær frá sér og dauðrotar!

Hvernig má skilja orð Valgerðar í vitali RÚV? 

Þannig skil ég orð hennar: Það er ekki í lagi að bauna á samflokksfélaga. Að svíkja varaformann Framsóknarflokks er greinilega með því alvarlegra sem einstaklingi getur orðið á stjórnmálaferli og í opinberu starfi (nema ef ske skyldi að andmæla Davíð Oddsyni).  

Valgerður sjálf segir í sjónvarpsviðtalinu að Bjarni Harðarson hafi "brotið af sér" gagnvart flokki og henni persónulega.  Á sama tíma vill Valgerður ekki segja neitt um hvort fleiri munu í kjölfarið segja af sér. Líklega metur hún ekki að afglöp í embættisfærslum gagnvart þjóð og íslenska ríkinu sé þess eðlis að þingmenn eða opinberir starfsmenn/embættismenn eigi að segja af sér!  Slíkt er daglegt brauð í hennar heimi - en að brjóta mót henni og flokknum, það er öllu alvarlegra!

Ergo: Það er í lagi að svíkja þjóðina, svíkir þú hinsvegar flokkinn, er þér refsað með þyngstu refsingu. Písknum er því harðar beitt í þágu flokksins en þjóðarinnar!  

Óvanalegt að þingmenn segi af sér

Hjálpi mér hamingjan! Eruði fædd í gær?

Sýndarsiðfræði?

Mistök?  Hvaða mistök?  Ef Bjarni Harðarson gerði mistök, í hverju voru þau þá falin? 

Heitir þetta verklag ekki "stjórnmál": Að enginn er annars bróðir í leik!

Halló!  Vaknið, verið ekki með svona sýndarsiðfræði, það fer ykkur illa.

 

 

Bjarni íhugi stöðu sína

"Pang" og prestvígsluafmæli

Í dag hélt ég upp á 11 ára vígsluafmælið mitt.  Já, það eru 11 ár síðan ég prestvígðist af herra Ólafi Skúlasyni biskupi Íslands. Ég vann í kirkjunni frá 08:00-20:30 og er nýkominn heim.  Dasaður en ánægður. Það var gott að vinna í kirkjunni í dag og notalegt að fá að vera í Guðs húsi á þessum degi. 

Í kirkjunni er verið að sýna listaverk nokkurra nemenda listaskólans "Konstfack" hér í Stokkhólmi.  Sýningin er mjög umrædd og umdeild svo ekki verði meira sagt. Eru umræðurnar búnar að vera svo háværar að ákveðið var að bjóða fólki inn til samtals um listaverkin. Voru samankomnir listamennirnir, ég frá kirkjunni (sem prestur og listfræðingur) og svo góður hópur af gestkomandi sem vildi ræða sýninguna.

Hluti listsýningar nemenda frá "Konstfack" í Stokkhólmi á St. Jakobskirkjunni.  "Umdeild list" eða list í umdeildu samhengi?

Niðurstaða fundarins varð að til er list sem verður að teljast innihaldsminni en önnur list. Listin er því (að mati flestra sem voru viðstaddir) óverðug fyrir kirkjuhúsið.  Þetta ræðst helst að skírskotunarþættinum og möguleikum listaverka til að setja sig í samband við kirkju og kristni. Fannst sumum listamönnunum að sköpunarfrelsinu vegið, um leið og aðrir viðstaddir töldu að þeim væri frjálst að skapa hvað sem þá lysti, bara ekki setja það i kirkjulegt samhengi.  

 Þetta var ekki lokaniðurstaða fundarins, en skemmtileg hugsun samt sem vekur enn frekari umræðu í framtíðinni.   :)

Hvar voru þessir efnahagsráðgjafar fyrir efnahagshrunið?

Það er alltaf létt að vera vitur eftir á. Verst að þessir oflaunuðu "ábyrgðarmenn" og svokölluðu efnahagsráðgjafar gegndu ekki skyldum sínum og sýndu ábyrgð FYRIR hrunið. Þá hefði verið hægt að koma í veg fyrir hluta vandans.

Nú eru fyrirtæki að segja upp starfsfólki um allt til að lækka launakostnað fyrirtækja til að bjarga eigin skinni og samdrátturinn er að aukast um allt.  Nú kemur fram fólk sem greitt hefur verið fyrir "ábyrgðarstöður" sínar úr vernduðu umhverfi stofnanna og ráðuneyta. Fólk sem veifar hvítum fánum og segir hróðugt; "Já við verðum að fara yfir allt fyrir opnum tjöldum".   Hvaða eindæmis forheimska er þetta?   Er það ekki það sem þetta fólk var ráðið til að gera í upphafi?  Ég er orðinn leiður, verulega leiður á öllum þessum lygum að þjóðinni, að þér og mér!

Kjörumhverfi fyrir spillingu

Bónusfáni á Alþingihúsinu!!!

Frétti hingað til Svíþjóðar að Íslendingar hefðu flaggað Bónusflaggi við hún flaggstangar Alþingishússins.   Kunningi minn var að segja að ástandið myndi stigversna núna næstu tvær helgar og ná hámarki við mánaðarmótin þegar uppsagnabréfin hafa farið út fyrir mánaðarmótin.

Svo ef þetta á að fara hríðversnandi verður það þá PrisExtra- eða Lidl-flagg sem blaktir þá við hún á Alþingishúsina næstu laugardaga? 

 

 

Er þetta ekki talandi um ástand okkar venjulega fólksins

Ég rakst á þessa mynd á bloggi vinkonu minnar. Þetta er úrklippa úr dagblaði hér í Stokkhólmi. Hún talar fyrir sig sjálfa:

Þetta verður erfitt fyrir Þorgerði Katrínu...

Í raun ætti að fara yfir og meta hvaða ferðir ráðuneytanna hafa verið nauðsynlegar og hverjar hafa bara verið farnar til leyfa ráðuneytis og þingmönnum að komast í stuttar skemmtiferðir til að sporta sig meðal fræga fólksins. Hafa t.d. verið fleiri ferðir fyrir jólin?  

Sannarlega er kominn tími til að ráðuneyti og yfirstjórn ríkisins þrengi líka sultarólarnar. Annað væri siðlaust!

 

Dregið úr ferðum ráðuneyta

Færeyjum allt!

Það vinarþel sem Færeyingar hafa sýnt okkur er fordæmislaust. Þessi óeigingjarna vinátta sýnir okkur hverjir standa okkur næst.

Skrifið ykkur endilega á listann ef þið viljið og sýnið þessu frændfólki okkar þakklæti okkar á táknrænan hátt. Við munum svo reynast þeim bestir fóstbræður þegar fram líða stundir og hagur þjóðarinnar fer að vænkast.

http://faroe.auglysing.is/

 

Á hann enn eignir meðan við greiðum skuldir hans?

Þetta er nú alveg ótrúlegt!  Þjóðin er skuldsett og fólkið er þrautpínt til framtíðar. Samt eiga stóreignamennirnir sem settu bankakerfið um koll peninga!  Ég skil þetta ekki. Var ekki byrjað á því að fara í vasa "gerendanna" í þessu máli?

Björgólfur íhugar að selja West Ham

Sameinumst gegn óréttlætinu

Hefur þú heyrt að stjórnmálamenn hafi reynt að komast hjá því að segja sannleikann um einhverjar stjórnarathafnir?

Hefur þú heyrt einhvern stjórnmálamann ljúga beinlínis að þjóðinni?

Hefur þér fundist siðleysið fara hreinlega úr böndunum hvað varðar fjármálastjórn landsins?

Hefur þú merkt hroka stjórnmálamanna í þinn garð?

Blöskrar þér bruðl stjórnmálamanna á skattpeningunum þínum?

Hefur þú heyrt að stjórnmálamenn hafi ekki viljað svara fyrir hlutabréfaeign sína í ónefndum fyrirtækjum?

______________________

Því miður hef ég getað svarað "já" við öllum spurningum.  Hvað með þig? 

Ég hvet alla landsmenn að svara óréttlætinu sem þeir eru beittir. Hvet þá að krefjast afsagnar bankastjóra og bankastjórna allra banka í landinu, ríkisstjórnar, bankaeftirlits og alþingismanna. Sameinast um málstað þjóðarinnar.

... og dýrmætust af öllu: þögnin

номенклату́ра  (nómenklátúra)  kallast það fyrirbæri þá er vildarvinum og flokksgæðingum var hyglað með embættaveitingum og bitlingum á tímum Sovétríkjanna sálugu. Þetta var almennt vitaður og viðurkenndur framgangsmáti í Sovétríkjunum og embættismannakerfinu þar eystra. Þarna klóraði hver flokksgæðingurinn öðrum á bakinu og allt sem ósagt var látið um embættisfærslur og einkalíf foringjanna, verðlaunaðist með kassavís af dýrindis frönsku eðalkampavíni, kavías svo sem maginn þoldi, sólarlandsferð til Svartahafsins, fyrirgreiðslum fyrir sig og sína af ýmsu tagi, kassavís af kúbönskum vindlum og kanski bifreið með einkabílstjóra sem fékk að aka á embættismannaakreininni í umferðinni.

Dýrmætast af öllu var metin þögnin.  Hún var gulls ígildi. Þögnin var að snúa bökum saman og gæta hagsmunna hinna ríku, flokksgæðinganna og viðhalda hinu óbreytta ástandi svo sukkið og spillingin gæti haldið áfram.

Jafnvel eftir að Sovétríkin liðu undir lok í sinni þáverandi mynd virðist þessi hópur hinna fáu hafa tekið á sig nýja mynd og form og skotið rótum víðar en mann grunaði.  Nómenklátúru Íslands þekkjum við nú öll í dag af frægðarverkum þeirra.

______________  

[Orðið nómenklátúra er hliðstætt við latneska orðið nomenclatura sem merkir eiginlega nafnalisti - listi hinna útvöldu].

Óþolandi að líða fyrir tortryggni

Hættulegar eldspýtur

(mynd)

Ég keypti fyrir nokkrum mánuðum nokkra eldspýtustokka af tegundinni Europa Hölzer (sjá mynd). Þessar eldspýtur eru vandmeðfarin vara. Þegar kveikt hefur verið á eldspýtunum, brennur brennisteinninn svo fljótt að hann nær ekki að lífga loga í sjálfri tréspýtunni. Blossinn hverfur næstum svo skjótt sem hann hefur lifnað.  Takist manni á annað borð að fá loga að festast í spýtunni, brennur hún illa.  Brenni spýtan á annað borð brotnar oft fremsti hluti eldspýtunnar oft af. Í þeim hluta er oft glóð sem svíður sig í tré, brennir gat á vefnað og teppi. 

Af fenginni reynslu datt mér í hug að vara fólk við þessari tegund eldspýtna.

Ferðalög til þróunarlanda ódýr núna - Ísland efst á listanum

Mér bara fannst ég þurfa að deila þessari jákvæðu frétt með ykkur heima:  

Í sænska blaðinu Metro ritar blaðakonan Brita Svedlund um Ísland sem ódýran valkost þegar skreppa á í stutta ferð til útlanda.   Í grein hennar (Metro, mánud. 03.11.2008, s.22) segir í léttri þýðingu minni:

Krónan fellur og umheimurinn verður dýrari, en núna hefur Metro sniffað fram þau lönd sem hafa orðið ódýrari í kjölfar efnahagsumbrotanna. Til dæmis hafa Suður-Afríka og Tyrkland orðið vinsælir áfangastaðir og svo síðast en ekki síst Ísland, sem nú verður að teljast "lá-budget eyja".

Heimurinn hefur orðið æ dýrari fyrir Svía. Þetta hefur gerst eftir að bandaríski dollarinn hefur hækkað um 25% gagnvart SEK, thaílenski bahtinn 22% og núna kostar 34% meira að kaupa kínverskt yuan en það var fyrir fjárhagshrunið.  Það er kannski huggun harmi gegn að núna getur maður flogið til Íslands, borða og versla ódýrt, þar sem íslenska krónan hefur tapað 36% af verðmæti sínu gagnvart sænsku krónunni. Þetta sést þegar krónurnar eru bornar saman eins og staðan var við upphaf árs 2008 og síðan núna í vikunni.

Flestir Svíar spyrja hvort fyrir hið fyrsta að þora að ferðast til Íslands, en við segjum fólki að nú sé lag að fara til Íslands og gera reyfarakaup, kaupa jólagjafirnar og dressa sig upp, segir Irene Mölleborn hjá fyrirtækinu Íslandsferðum. Icelandair lokkar nú fólk til landsins með tilboðspakka upp á 3 385 SEK (um 55 000 ISK) þar sem innifalið er flug og þrjár nætur á fjögurra stjörnu hóteli.

Sá sem ætlar að fara til Íslands kemur að eiga í erfiðleikum að kaupa gjaldeyri hér í Svíþjóð. Hin brauðfóta gjaldmiðill Íslands er svo óstöðugur að myntskiptifyrirtæki þora ekki að kaupa inn íslensku krónuna. Maður veit hreint ekki hvers virði hún er. Fólk er því hvatt till að skipta frekar bara á Íslandi, nokkru sem Íslendingar gera með feginshendi.

Listi yfir lönd sem hagkvæmt hefur orðið fyrir Svía að ferðast til:

Island -36%; Suður-Afríka -24%; Tyrkland -14%; Ástralía -13% og Nýja-Sjáland 12%

Listi yfir lönd sem óhagkvæmara hefur orðið fyrir Svía að ferðast til:

Japan +51%; Kína +34%; Bahamaeyjar +29%; USA +25%; Jórdanía +25%; Egyptaland +24%; Thaíland +22% og Dóminíkanska-Lýðveldið +18%

Þá er það spurningin, hvernig spilum við Íslendingar úr þessari auknu eftirspurn. Höldum við verðinu niðri heima á Íslandi og aukum veltuna í samfélaginu með heimsóknum útlendinga eða byrjum við að hækka verðið og eyðileggja þessa nýkomnu veltu, innkomu erlends gjaldeyris og bestu auglýsingu í fleiri ár?    Heyrði að Geir Haarde ætlaði að skera þessa vaxtarbólu á púls núna fljótlega með hækkun verðs á áfengi!   Líklega tekst ríkisstjórninni að drepa þennan vaxtarbrodd með einhverri aðferð.  

Það virðist sem allir viti betur en við sjálf. Hvað var það sem við skyldum ekki?

Ég leyfi mér að vitna í orð norska hagfræðingsins Harald Magnus Andreassen: 

Ábyrgðin vegna íslenska efnahagshrunsins liggur fyrst og fremst hjá bönkunum, ríkisstjórn, Seðlabanka, Fjármálaeftirliti og Alþingi. Þetta segir norski hagfræðingurinn Harald Magnus Andreassen, hagfræðingur hjá norska verðbréfafyrirtækinu First Securites, en hann hefur kynnt sér íslensk efnahagsmál.

„Þessar stofnanir samfélagsins eru ábyrgar með einum eða öðrum hætti. En ekki venjulegt fólk, Jón og Gunna,“ segir Andreassen.

 ___________

Þá kemur spurninga/tékklistinn:

1) Hverjir sitja í og stýra Seðlabankanum í dag?  Svar: Þeir sömu og stýrðu honum inn í fjárhagskreppuna.

2) Hverjir sitja á Alþingi í dag?   Svar: Þau hin sömu og stýrðu landinu inn í frjárhagskreppuna.

3) Hverjir sitja í Fjármálaeftirlitinu í dag?   Svar:  Þeir hinir sömu og leyfðu bönkum og verðbréfamörkuðum að sigla inn fjárhagslega svartholið óáreittum.

 

... og hvað ætlar þjóðin að gera í þessu?   Svar: Ekkert. Það er sama þrælslundin og venjulega.

„Hefði átt að vera búið að stoppa ykkur fyrir löngu"