Leitið, og þér munuð finna!

Einhvern veginn leggst sá grunur að mér að Sigurður Einarsson muni aldrei greiða skuldir sínar til VÍS. Sú var tíðin að heiðarleiki var metinn öðru fremur í viðskiptum. Nú er annað uppi á teningnum.  Sveitasetrið við Veiðilæk er kannski gott dæmi um hversu veruleikafirrtir þeir aðilar eru, sem stýrðu fjármála"heimi" Íslands (og grófu undan fjármálaveldum annarra landa) á útrásarárunum. Líklega trúði Sigurður Einarsson að hann gæti lifað í hamingjusamri spillingu lífið út, án þess að þurfa greiða krónu fyrir. Líklega hugsaði hann sér að vel mætti yfirláta okkur þúsund hlutabréf fyrir byggingarframkvæmdirnar við Veiðilæk, þótt peningar kæmu þar aldrei nærri. Enda hlutabréfin ekki verðmeiri en pappírinn sem þau voru prentuð á. 

Ég bíð spenntur eftir að skattrannsóknarkvestorar og tilkallað fólk annað með sérþekkingu í leit ástæðna efnahagshrunsins og þeirra sem ábyrgir eru - finni það sem þeir eru að leita að [til frekari glöggvunar: Matt. 7:7a].

200 milljóna veð í sveitasetri

Vorboðarnir góðu

Hérna fyrir utan hjá mér í norður Stokkhólmi eru farnir að skjóta upp kollinum vorboðarnir góðu. Litlir laukar hér og þar í glöðum litum sem skrækja í kapp við hvern annan "Vor, vor, vor....".

Ég sló saman tveimur myndum sem ég tók í morgun hérna utan við húsið. Já, núna er komið vor með +9°C og sól.  Vonandi er vorið líka á leið til Íslands nú þegar ég er væntanlegur þangað. B

Bestu kveðjur í sól og vori!

Þreyttur...

Blogga kannski stopult á næstunni. Hef svo mikið að gera og er hálf dasaður. Þá er ágætt að hverfa frá hversdeginum og gera eitthvað annað til tilbreytingar en sömu gömlu rútínuna. 

Fylgist þó með ykkur áfram bloggvinir.   

ps. Vorið er á næstu grösum hér ytra. 

Orgelkonsert i Sankti Jakobskirkjunni

Tónlist er undursamleg leið at vekja stemningu, slappa af og tengjast öðru fólki. Á hverjum föstudegi klukkan 17:00 safnast saman lítill hópur fólks í Sankti Jakobskirkjunni í Stokkhólmi til að hlusta á orgeltónlist. Það er aðalorganisti kirkjunnar, Michael Waldenby sem oftast sér um að leika á hið stóra Marcussen & Søn (Aabenraa) orgel kirkjunnar. Tvö Marcussen & Søn orgel eru til í á Íslandi að ég veit. Eitt stendur í Fella- og Hólakirkju í Breiðholti, Reykjavík og eitt í Blónduóskirkju, Blónduósi. Orgelið í Jakobskirkjunni í Stokkhólmi er eitt hið stærsta i Svíþjóð og eitt það sem býður upp á mesta möguleika i disposition sinni. Hér er hægt að lesa um orgelið:  http://sv.wikipedia.org/wiki/Sankt_Jacobs_kyrka .

 (klikkið á myndina til að stækka hana)

Í dag nutum við undursamlegrar tónlistar eftir Johann Sebastian Bach [1685-1750], Felix Mendelssohn-Bartholdy [1809-1847], Max Reger [1873-1916], André Campra [1660-1744], Gustaf Hägg [1867-1925], Michael Waldenby [1953- ], L.J.A Lefébure-Wély [1817-1869] og Louis Vierne [1870-1837].  Það var undursamlegt að heyra tóna þessa fallega og áhrifamikla hljóðfæris fylla Jakobskirkjuna. Allir voru sem uppnumdir af þeirri stemningu sem organistinn skapaði. Oft hefur verið sagt að Bach sé fimmti guðspjallamaðurinn. Þannig hefur tónlistin með sinni tækni, frásagnarlist og "sköpunnargleði kallað fram hughrif sem líkja má við áhrif frásagna guðspjallanna.

Nóg um það!   Bestu kveðjur úr síðasta snjó vetrarins. Á þriðjudag er spáð +10°C.  :)  ....  og svo á aðfararnótt sunnudagsins skiptum við yfir í sumartíma hér ytra.  Þá verða aftur tveggja tíma munur á Íslandi og útlandinu.  

Fólki er ekki sjálfrátt!

Af niðurstöðu nefndar Sjálfstæðisflokks (= Sjálftökuflokksins) um peningamál má sjá að fólki er ekki sjálfrátt lengur. Nefndin um peningamál - sem hlýtur að vera ein sú stærsta og mikilvægasta innan Sjálfstæðisflokksins - enda sjálftakan úr ríkiskassanum búin að vera algjör undir síðustu nær 20 árin, er svo veruleikafirrt og svo langt komin frá öllum veruleika að best væri að benda þeim á að flytja inn á EURO-svæðið.  Helst að flytja til þeirra landa sem verst hafa það á efnahagssvæðinu, ÞRÁTT fyrir EURO.  Fullkomið hrun blasir við í þeim löndum gömlu austur-Evrópu, sem tengt hafa sína gjaldmiðla við EURO.  Að hafa fulla tengingu við EURO hjálpar ekki þessum löndum. Þvert á móti er tengingin að sliga efnahagslífið í þessum löndum, ásamt þeirri einföldu ástæðu að nú á tímum erfiðleika í efnahagslífi, starfar einstök lönd ESB af fullum krafti að bjarga því sem bjargað verður heima fyrir, meðan önnur minna stöndug lönd eru látin sogast niður með baðvatninu...   Samheldni bandalagsins er engin, stöðugleiki EURO er engin og EURO, þótt ein stærsta gjaldmiðilseining heims, er ein þeirra veikustu.  Af hverju?  Því of margir óvissuþættir stýra henni.

Þessa mynteiningu vill Sjálftökuflokkurinn innleiða á litla Íslandi. Sjálfstæðisflokkurinn hefur ekkert um svona hluti að segja. Hann nýtur ekki trúnaðar þjóðarinnar lengur. Hann leyfði útrásarmönnum að setja Ísland á hvínandi kúpuna og fyrir það er ég EKKI þakklátur.

Evran komi í stað krónunnar

Tinni í Tíbet

Tinni og félagar komust aldrei til Tíbet vegna stjórnmálaástandsins í landinu. Í fréttum undanfarið hefur komið skýrar og skýrar fram hverjir eru að taka völdin í heiminum og hverjir eru að glata þeim. Stóru máttugu nýlenduþjóðirnar hurfu af sjónarsviðinu þegar við lok Fyrri heimstyrjaldarinnar, eða á öðrum tug 20. aldarinnar. Breska heimsveldið, ljónið ógurlega varð tannlaust og tapaði klónum. Nýlenduþjóðirnar sem plagað höfðu lönd Afríku s.s Belgía, Þýskaland, Frakkland og Ítalía glötuðu sínum áhrifum og urðu síðar, eða eftir lok Síðari heimstyrjaldarinnar að gefa eftir tilkall sitt til mikilla landflæma.  Lokahnykkurinn reið svo yfir hjá Bretum þegar nýlendum þeirra var gefið nómínelt sjálfstæði og Hollendingar töpuðu nýlendum sínum samtímis og Portúgalar. Spor finnast hér og hvar eftir þennan tíma, tungumál og ritmál, blóðugur svörður og staðbundin menningareyðing.

Bandaríki réðu svo fyrir málum frá lokum Kalda stríðsins eftir að Sovétríkin liðuðust í sundur og mölur komst í Járntjaldið.  Eftir stendur stórveldið Bandaríkin og Kína í dag. Kína er land sem með stærð og fjölda landsmanna hefur sannarlega stækkað hraðar en nokkurn óraði fyrir. Kína og útþenslustefna þess er farin að láta á sér bera svo um munar. Sjálftakan í formi valdaráns i Tíbet er augljós þeim sem bara horfir þangað.

Í ótta sínum að lönd heimsins muni um síðir opna augu sín fyrir mannréttindabrotum Kínverja í landi Tíbeta, reyna þeir að stöðva ánna við ós. Já, með því að setja nokkrum þjóðum fótinn fyrir dyrnar svo sem Suður-Afríku.  Viðskiptatengsl eru mikilvægari mannréttindi og þannig hefur það lengi verið í Suður-Afríku.  Miklar framfarir hafa verið í því landi, en betur má ef duga skal. Milljónir íbúa stórborga búa í pappakössum og hafa hvorki aðgang að hreinu vatni, frárennsliskerfi (klóak), heilsugæslu eða menntun. 

Þetta land, sem nú á að halda stórmót í íþróttum á komandi árum og vera í heimspressunni, styður nú mannréttindabrot og framfarir Kínverja í Tíbet með að hafna Dalaí Lama þátttöku á alþjóðaráðstefnu um frið.   Viðbrögðin hafa verið sterk.  Friðarverðlaunanefnd Nóbels hætti við þátttöku, og slíkt hafa fjöldi annarra þátttakenda gert í mótmælum við framgöngu gestgjafanna.  Þessi friðarráðstefna sem skipulögð var til að kalla eftir jákvæðri mynd af Suður-Afríku nú fyrir Heimsmeistarakeppnina í fótbolta fór því út um þúfur vegna hagsmunaárekstra og stórveldistilburða Kínverja.  Ég tel að þjóðir heimsins eigi að skíta hreint í Heimsmeistarakeppnina í fótbolta þar til Suður-Afríka hefur náð sönsum.

Friðarráðstefnu aflýst vegna Dalaí Lama

Þegar fingur verða langir og vasar djúpir

Framkvæmdastjóri Sjálfstæðisflokksins, Andri Óttarsson, játar að hafa tekið á móti stórum fjárhæðum frá fyrirtækjum í opinberri eigu. Þetta heita á mínu heimili "mútur", get ég skotið inn hér, en viðmiðin eru greinilega mismunandi.  Hann setur fyrirvara á endurgreiðslur, að allt verði endurgreitt sem "stangist á við lög". Hvað er maðurinn að fara?  Er honum og flokkselítunni ekki ljóst að það er fullkomlega siðlaust að taka við fjármunum frá opinberum fyrirtækjum eða fyrirtækjum í opinberri eigu, ef ekki hefur komið til stjórnvaldslegrar ákvarðanatökum þess efnis?

Nú þegar íslenska þjóðin er látin greiða spilavítaskuldir "útrásarliðsins" og þegar handrukkarar IMF koma og krefjast vaxtahækkana af hálfsligaðri þjóðinni - kemur í ljós að Sjálfstæðisflokkurinn hefur gengið sjálfala í fjárhirslum ríkisins. Sjálftakan verður að hætta. Þetta eru fjármunir þjóðarinnar ekki stjórnmálaflokka.

Neyðarlínan, þetta fyrirtæki sem þjóðin hefur borið traust til hingað til, hefur einnig verið girt spurningamerkjum. Hvaða ávinning ætlaði Neyðarlínan sér með slíku athæfi að greiða hundruðin þúsunda króna í djúpa vasa Sjálfstæðisflokksins?   Þetta ber að athuga ekki síður en að skoða hverjir aðrir hafa verið að leggja fé í hendur sjálfstæðismannanna og þá með hvaða ávinning í huga?

NÝTT FORDÆMISGEFANDI FRÁ SVÍÞJÓÐ:

http://www.dn.se/opinion/debatt/vi-stoppar-chefsbonusar-i-statens-alla-foretag-1.828559 ´

Já, Svíar hafa hætt með allar bónusgreiðslur til yfirmanna, fyrir stjórnarsetu og fyrir að sitja í nefndum og ráðum opinberra sjóða.    Gæfan gefi að slíkt fyrirfinnst ekki á Íslandi.

Skilar framlagi Neyðarlínunnar

Svo fór að snjóa aftur í Stokkhólmi

Ég verð að játa að mér finnst þetta orðið svolítið leiðigjarnt og farið að minna ískyggilega á íslenskt veðurfar.  Fyrir nokkrum dögum var +7°C og rjómablíða hér í borg. Núna hefur þessi kærkomni hiti horfið og í morgun var snjór yfir öllu og -3°C.  Vetrarlegt ekki satt?

Tók þessa mynd í ljósaskiptunum eldsnemma í morgun. Horft til suð-austurs af svölunum mínum, út yfir Lappkärret. Í fjarska gefur að líta fjarvarmastrompa í Stór-Stokkhólmi og "Gömlu gasklukkuna" sem stendur í hverfinu Hjorthagen. [BGB]

Að Sjálfstæðisflokkur mælist með fylgi, er brandari ársins!

Samkvæmt könnun Capacent Gallup sem gerð var fyrir Morgunblaðið og Ríkisútvarpið kemur fram að Sjálfstæðisflokkurinn mælist með fylgi. Og ekki bara það, heldur mælist sá flokkurinn með 26,5% fylgi. Ég spyr, eru þessi 26% haldin sjálfspíslarhvöt? Ekki bara það, eru þessi rúmu 26% haldin þjóðarmasókisma?  Eitt er víst 26% þjóðarinnar eru illa haldin og veruleikafirrt að mestu leyti.  Að skilja ekki að það var Sjálfstæðisflokkurinn með ötulli hjálp Framsóknarflokks sem kom Íslandi á steinaldarstigið er mér með öllu óskiljanlegt.

Ég finn til með þessum 26% og vænti þess að komandi ríkisstjórn Vinstri Grænna og Samfylkingar muni hlúa að þessu fólki með uppbyggingu heilbrigðiskerfisins.    

Ný könnun: Stjórnarflokkarnir fengju meirihluta

Hin "franska fálkaorða"?

Eru Moggamenn alveg að sleppa sér!  Heiðursmerki frönsku Heiðursfylkingarinnar eða Legion d'Honneurog Fálkaorðan okkar íslenska eru vissulega  æðsti heiður sem löndin sýna borgurum sínum og borgurum annarra landa. En þar skilur líka að.

Útlit og upphaf þessara orða vísar í sínar tvær áttirnar. Önnur á upphaf sitt á róstutímum Frönsku byltingarinnar þegar kirkja og konungdæmið voru næstum því jafn hataðar stofnanir. Því er Heiðursfylkingarmerkið ekki kross, riddarakross eða hvað maður vill kalla það, heldur "heiðursmerki". Fálkaorðan er hinsvegar stofnuð (1921) af danska konunginum Kristjáni X og þar með konunglegt upphaf.  Orðan er krossformuð og byggir þar með á kristnum gildum og grunni.  

Frakkar heiðra hermann sem barðist í fyrri heimsstyrjöldinni

Inquistior Joly

... quoniam punitio non refertur primo et per se in correctionem et bonum eius qui punitur, sed in bonum publicum ut alij terreantur, et a malis committendis avocentur.

(Lauslega snúið á íslensku:"... ekki bara til góða hinum [seka] og til að refsa honum heldur til góða hinum almenna borgara, að hann óttist og haldi sig frá vondum verkum.")

Svo hljóða orðin úr handbók rannsóknara Hins heilaga rómversk katólska rannsóknarréttar frá 16. öldinni. Orðin eiga við um Ísland í dag.  Þetta er hryllilega sorglegt, en vissulega satt. Veiðarnar eru hafnar. Engu skal þyrmt til að fletta ofan af skjólshúsum og skúmaskotum fjárglæframanna. Engu! 

Hreinsunin á að vera algjör, engum skal þyrmt. Spillingin verður að hreinsast burt og svo grimmilega skal gegnið fram að þetta verði öðrum til viðvörunar. Fréttir af rannsóknarnefndum og skilanefndum sem búa erlendis á 5 * hótelum vekur einungis viðbjóð!  Hingað og ekki lengra. Þetta má ekki ganga svona lengur.

Nú er bara fyrir Evu Joly að setja upp gúmmíhandskana því skíturinn er mikill og spillingin algjör.  Burt með hina íslensku nómenklátúru!

 

Eva Joly hreinsar út á Íslandi

Ptolemaios - elska þinn næsta

Sumar fjölskyldur segja sig eiga í innri vandræðum og stríði. Spurningin er hvort þessar fjölskyldur ættu ekki að hugsa málið svolítið betur og sjá að oft er um smáskeinur og minniháttar hagsmunaárekstra að ræða. Hér drep ég stutt á sögu einnar fjölskyldu sem virðist hafa átt erfitt með að tala saman og leysa innri ágreining (það er erfitt að greina frá öllu í krónólógískri röð því fólk kom og fór á veldisstóli faraóarna):

Ptolemearnir (hvílíkt lið!)

Ptólemaios XII  Faraó yfir Egyptalandi. Hann vissi aldrei hvort hann var að koma eða fara. Tvisvar er hann faraó. Hann vissi aldrei hver móðir hans hefði verið, hún var sennilega myrt. Hann var sérstakur á margan hátt. Spilaði á flautu og elskaði svallveislur og munað. Klæddi og málaði sig svo að erfitt var á stundum að vita hvort hann var karl eða kona, eða hver hann almennt væri. Þetta kallast víst að vera andrógyn í dag. Nú, hann átti ekki alla sjö dagana sæla. Þegar hann var löngum að heiman, greip dóttir hans, Berníke fram fyrir stjórnartaumana og gerði hann útlægan. Hundeltur af hermönnum dóttur sinnar náði hann þó að komast til Egyptalands aftur þar sem hann lét síðar myrða dóttur sína Berníke sem þá ríkti yfir Egyptalandi (sjá neðar).

Kleópatra V Var drottning Ptólemaíósar XII og meðstjórnandi. Hún tók þátt í uppreisn dóttur sinnar Berníke IV mót eiginmanni sínum og föður Berníkes IV. Berníke fannst hún erfið í stjórnarsamstarfinu svo hún lét myrða móður sína.

Berníke IV Faraó varð hún eftir að hafa rekið föður sinn Ptólemaíós XII frá völdum. Hún sat sem faraó frá árinu 58 til 55 þá er faðir hennar mútaði sér inn í ríkið (en hann hafði verið gerður útlagi)  og tók við valdataumum aftur með aðra dóttur sína Kleópötru VI sem meðstjórnanda. Í kjölfarið lét hann myrða Berníke IV.

Kleópatra VI Var elsta dóttir Ptólemaíósar XII. Faraó í tvö ár saman með litlu systur sinni Kleópötru VII sem síðan lét eitra fyrir henni.

Arsinóe IV Gerði uppreisn mót Kleópötru VII. Var síðan myrt af Antóníusi, að beiðni Kleópötru.  

Kleopatra VII  Faðir hennar dó þegar hún var 18 ára.  Hún átti barn með Júlíusi Sesari og Markúsi Antóníusi. Framdi sjálfsmorð.

Ptólemaios XIII  Faraó 51-47 f.Kr. við hlið Kleópötru VII.  Lenti upp á kant við Kleópötru hélt sig undan en lenti síðan í ófriði við Rómverkja og dó (drukkaði).

Ptólemaios XIV Var faraó í stuttan tíma við hlið Kleópötru (samstjórnandi) en var síðan byrlað eitur af hverju hann dó stuttu síðar.

Ptólemaios XV ”Caesarion” sonur Caesars og Kleópötru VII. Lifði til 17 ára aldurs eða fram til loka orrustunnar við Actium. Var myrtur eftir hana.

Ptolemaios XII [117-51] 66 ára                                   

Kleópatra V [?-?]                                          (eiginkona Ptolemaiosar XII) Byrlað eitur.
Berníke IV  [77-55] 22 ára                            (dóttir Ptolemaiosar XII) Sennilega skorin á háls.
Arsinoe IV [67-41] 26 ára                             (dóttir Ptólemaiosar XII) Stungin með hníf.

Kleópatra VII [79-30] 49 ára                         (dóttir Ptólemaiosar XII) Framdi sjálfsmorð, eitur.
Ptolemaios XIII [61-47] 14 ára                      (sonur Ptolemaiosar XII) Druknar.
Ptolemaios XIV [60-44] 16 ára                      (sonur Ptolemaiosar XII) Byrlað eitur.
Ptolemaios XV [47-30] 17 ára                       (sonur Kleópötru VII) Myrtur.

Pre-Rafaelítar

Eftir að hafa haft hádegismessu í Jakobskirkjunni og stuttan fyrirlestur um Passíusálma séra Hallgríms Péturssonar á sama stað, átti ég stefnumót við góða vinkonu mína og vinnufélaga Elínu Elfström.  Hún er listnemi og framúrskarandi góður portrettmálari.  Við höfðum semsagt ákveðið í dag að hittast og fara í Ríkislistasafnið hérna úti á Blasieholmen, Nationalmuseum. Nýverið var sett upp ný og áhugaverð sýning á verkum hinna svokölluðu "Prerafaelíta". Líklega er best að setja strik milli Pre og Rafaelíta til glöggvunar á sjálfu heitinu. 

Hér til hægri getur að líta eitt af höfuðverkum þessa stórmerka hóps breskra listamanna. Málverkið ber nafnið "Vanity" eða "Hégómi". Myndin er máluð af einum síðasta prerafaelítanum; Frank Cadogan Cowper[1877-1958] árið 1907. Myndin er í eigu Royal Academi of Arts, London.

Margir frægir listamenn stóðu framarlega í fylkingu pre-rafaelítarna. Nefna má Dante Gabriel Rosetti, Ford Madox Brown, John Brett, William Holman Hunt, John Everett Millais, Edward Burne-Jones og Henry Wallis.

 Hreyfing Pre-Rafaelítarna var stofnuð 1848 af Holman Hunt og John Everett Millais. Nafn hreyfingarinnar er dregið af þeirri tilraun (og í mörgum tilfellum tókst þeim vel upp) að endurskapa þá aðferðafræði sem lá að baki málverkum endurreisnarinnar sem tilkom fyrir tíma hins fræga endurreisnarmála Rafaels. Táknfræði, tungumál listarinnar fékk hér aðalhlutverkið og margslungnar myndir, sem ekki eru lausar við hið draumkennda og vissa munúð samtímis og frómheit upphefjast með riddaramennsku og nostalgíu. Riddarasögur, goðafræði, gullaldarritverk breskrar tungu og viktoríanskt líf skapar hér ramman um hreyfinguna. Hreyfingin átti sín bestu vaxtarskilyrði í Bretlandi, en breiðist út og nær fótfestu í hinum svokallaða júgend stíl eða art nouveau.Art and Crafts hreyfingin (með sínum iðnaðarinnslögum) tók víða vel í hið dekoratíva eða skreytilist Pre-Rafaelítanna. Svo þeir voru framarlega í listsköpun síns tíma og þess sem koma skyldi. Synd væri því að segja að módernisminn hefði einvörðungu átt upphaf sitt í Frakklandi í hverfunum kringum Sacre-Coeur kirkjuna.  :)

Meðal listamanna Pre-Rafaelítanna voru nokkrar konur sem voru engir eftirbátar karlanna sem grundvallað höfðu hreyfinguna. Ein sú frægasta var Elizabeth Siddal. 

Hér til vinstri gefur að líta málverk Dante Gabriel Rosetti [1829-1862] "Venus Verticordia" frá 1864-1868.

Sem sagt:  Frábær sýning og metnaðarfull.  :)

 

 

 

 

 

Lykilorð: Pre Raphaelite Brotherhood / Pre-Raphaelites / Pre-Raphaelites / Rafaelítar

Vakna, Síons vörður kallar!

Þjóðkirkjan, stærsta kirkjudeild á Íslandi er að tapa meðlimum svo að það bara æpir á mann. Eru Íslendingar búnir að finna eitthvað betra eða eru þeir ekki eins andlegir og sækja ekki eins í þekkinguna um Guð og áður?   Af hverju flýr fólkið Þjóðkirkjuna?  "Biðjandi, boðandi, þjónandi" eru einkunnarorð Þjóðkirkjunnar í "lógói" hennar.  Hvað getum við gert til að bæta, laga og boða?   Tölfræðin talar fyrir sig sjálfa (tilv. Hagstofa Íslands):

Ár	Mannfjöldi alls á Íslandi	Fjölgun	Skráðir meðlimir Þjóðkirkjunnar	Breyting milli ára (einstaklingar)
1994	265.064		244.925	-397
1995	266.978		245.049	-653
1996	267.958		244.060	-2.237
1997	269.874		244.684	-912
1998	272.381		246.012	-617
1999	275.712		247.245	-882
2000	279.049		248.411	-931
2001	283.361		249.256	-765
2002	286.575		249.456	-686
2003	288.471		250.051	-843
2004	290.570		250.661	-953
2005	293.577		251.728	-851
2006	299.891		252.234	-1.212
2007	307.672		252.461	-1.484
2008	313.376		252.948	-1.230

Þetta vekur vissulega spurningar um hvar við getum bætt okkur.  Ég tel að eitthvað liggi að baki þessari tölfræði sem taka ber alvarlega.  

Ekki sjálfgefið að trúin sé meðfædd

Af hverju drepa ungir menn?

Spurningin vekur kannski óhug, en við verðum að spyrja hennar. Hvað hefur gleymst?  Hefur mannlegi þátturinn gleymst. Ég er ekki að ráðast á skólakerfið. Ég er ekki að beina orðum mínum að neinum sérstökum, heldur vil ég að orð mín skiljist sem áminning til samfélagsins. Eftir að hafa gert grein fyrir ætlunum sínum, ganga þessir ungu menn til verks. Þeir gerast böðlar, þeir taka sér fyrir hendur ódæði sem mætir engum skilningi. Það merkilega er að þegar þessir strákar hafa lagt út sín myndbönd og "manifestation" eru fyrstu viðbrögðin múgsefjun, aðdáun og jafnvel öfund.  Djarft útspil piltanna leiðir til að fleiri sjá sig í sporum þeirra og þegar "hápunktinum" er náð, þegar þeir hafa náð valdi á lífinu með því að valda dauða, angist, sorg, vanlíðan, örvæntingu...    er verkefninu lokið og fullnægt.

Dauðinn verður einskonar hreinsunarferli (kaþarsis), sætting - friðkaup. EN: Friðkaup sjúkra ungmenna. Og þetta uppgjör er dýrkeypt. Líf annarra og þeirra sjálfra.

Ljótleikinn er fullkominn. Eitthvað er illa komið af braut og sjálfsmyndin brengluð.  En það er einmitt það sem er hið sjúka. Hvað hefur gerst?  Ungi maðurinn í Kauhajoki í Finnlandi, sem drap 10 manns síðastliðið haust var afar sjúkur. Hann hafði komið grátandi til mömmu sinnar og spurt hana stuttu eftir 21. afmælisdaginn sinn "mamma, af hverju á ég enga vini?"  Að vera viðurkenndur, meðtekinn var allt hann þráði. Hann þarfnaðist vina, hann þarfnaðist meðbræðra, hann þarfnaðist að tekið væri eftir honum, hann þarfnaðist "hópsins".  Í stað þessa var hann utanveltu, sjaldan var yrt á hann, þá helst niðrandi eða í eins atkvæðis orðum.  Hann hafði verið lagður í þögult einelti.  Svipaða sögu virðast allir ógæfusömu piltarnir hafa reynt og fengið að líða.  

Voru þetta bara ódælir, óuppaldir guttar sem vildu fá athygli hvað sem það kostaði?  Nei flestir voru prúðir strákar sem aldrei sköpuðu vandræði. Komu þeir frá brotnum heimilum og stóðu sig illa í skóla? Nei allir voru í meðallagi í skóla eða yfir meðallagi. Einhverjir komu frá brotnum heimilisaðstæðum en þó ekki svo að það sé talin ástæðan eftir miklar rannsóknir. Flest heimilin gátu sýnt kærleika og hjástoð. 

Af hverju er ungt fólk að taka líf sítt umvörpum?  Af hverju eru ungmenni að berjast við anorexíu?  Af hverju eru ungar stelpur að skera sig um allan kroppinn og sumar að skera sig á púls?   Af hverju eru ungir menn í blóma lífsins að gasa sig, skjóta eða hengja?

Enginn veit öll svörin. Óhamingja, vanlíðan, sjúkdómar hafa alla tíð fylgt mannkyni. En hvað getum við gert til að spyrna við fótum. Mér blöskrar svo!  Sóunin er svo fullkomin þegar ung manneskja skaðar sig og jafnvel til ólífis.  Hvað vilja þau segja okkur hinum?   Hvað getum við gert?

Hefur samfélagið ekki gleymt þessum litlu sálum sem fela sig bak við merkjavörur, iPoda, tískuskart, snyrtivörur og tækjakaup?   Sjáum við samfylgdarfólk þeirra í gegnum skrápinn sem þau eru að byggja um sig. Sjáum við ekki að okkur er bara ætlað að horfa á skrápinn, skelina en ekki Á ÞAU!  Það eru ÞAU sálin, persónan sem við eigum að horfa á, sinna og vera vökul fyrir.  Er okkur lagið að dæma þau fyrir þetta og hitt í stað þess að hlusta á þau, gefa þeim tíma að segja frá og síðan ef til vill gefa ráð sprottin af kærleika og innsæi í þeirra líf.

Af hverju koma sjálfsvíg, og svo að maður tali nú ekki um svona fjöldamorð, á óvart?  Sá/sú sem tekur sitt líf er langt kominn í eigin vanlíðan, svo langt að engir útvegir eru lengur sýnilegir. Alsherjar blindu slær augun og "besta/eina lausnin" valin til að ljúka óhamingjunni. Í sumum tilfellum er um andleg veikindi að ræða, þar sem einstaklingurinn er ekki 100% við stjórnvölinn. Í öðrum tilfellum er um vangetu til að sjá lausn, útgönguleið og von á að framtíð geti mögulega fundist handan myrkursins. 

Í þeim heimi sem við lifum í dag, er ljóst að ytri kröfur á ungmenni í formi fyrirmynda, hópleiðtoga og krafna frá "hópnum", tíska og af þessu brenglaðar sjálfsmyndir eiga stóran þátt í því hvernig komið er.  Aðlögunarhæfni sumra er takmörk sett. Og sjálfstæð ungmenni eru ekki síður í hættu en þeir sem dragast með strauminum.  

Verum vakandi, hlustum!

 2009 Mars: Winnenden -16 dánir!

Listi yfir svipaða atburði:

September 2008:Finnskur 22 ára strákur skýtur 10 manns í Kauhajoki í vestra Finnlandi. Níu nemendur og einn kennari deyja. Hann skýtur sig síðan sjálfan eftir ódæðið.

Nóvember 2007:Finnskur 18 ára strákur skýtur 8 manns í Jokela, 50km norður um Helsinki. Átta deyja, en 13 særast. Hann skýtur sig síðan sjálfan eftir ódæðið.

Apríl 2007:Bandarískur 23 ára nemandi drepur 33 nemendur og starfsmenn Virginía Tech í Blacksburg i Virginíu. Hann fremur sjálfsmorð eftir ódæðið.

September 2006:Í ríkinu Wisconsin í Bandaríkjunum skýtur 15 ára strákur í bænum Cazenovia skólastjórann sinn.  

September 2006: Strákur, 25 ára skýtur til dauða eina manneskju og særir 20 áður en lögreglan skýtur hann í klessu, eða nær til ókennis.

Nóvember 2005:Staðgengill rektors er skotinn af 15 ára strák í skóla í Jacksboro í Tennessee í Bandaríkjunum.   

Mars 2005:Eftir að hafa myrt tvo ættingja, skýtur 16 ára nemandi í skóla í Red Lake í Minnesota 5 samnemendur sína og einn kennara.  Eftir morðin, skýtur hann sig í hausinn.

September 2003:Í Cold Spring í Minnesota, skýtur 15 ára strákur tvo jafnaldra sína. 

Apríl 2003: Skólastjóri í skóla í bænum Red Lion í Pennsylvania er skotinn til bana af 14 ára nemanda sem síðan tekur sitt eigið líf.

Apríl 2002:Í Gutenbergmenntaskólanum í Erfurt í Thüringen flippar 19 ára strákur. Hann banar 12 kennurum, 2 nemendum, skrifstofukonu og einum lögreglumanni. Eftir ódæðið skýtur hann sig sjálfan.

Mars 2001:Í Santee í Kaliforníu drepur 15 ára strákur 2 skólabræður sína og særir 13 aðra. 

Maí 2000: Flórída fær líka sinn skerf þegar 13 ára strákur skýtur kennarann sinn í skóla í Lake Worth.

Febrúar 2000:Krakki, 6 ára gamall skýtur annan sex ára strák í skóla í Mount Morris Township í Michigan í Bandaríkjunum. 

Nóvember 1999:Í Deming í ríkinu Nýju Mexíkó í Bandaríkjunum skýtur 12 ára strákur 13 ára skólafélaga sinn og drepur hann þar með.

Apríl 1999:Í Columbine High School i Littleton í Colorado skjóta tveir nemendur 12 nemendur og 1 kennara áður en þeir taka sín eigin líf.

Bambar

Þegar ég vaknaði í morgun varð mér lítið út og sá ég þá þessi dádýr skoppandi um í skóginum sem skilur að götuna mína og litla stöðuvatnið Lappkärret (sem er á stærð við hálfa Tjörnina í Reykjavík).

Litlu fallegu hirtirnir sem hafa verið að skoppa hér í skóginum eru kallaðir rovdjur hérna úti og eru til út um alla Svíðþjóð og mest alla Evrópu. Latneska heitið er (Capreolus capreolus) og eru dýrin lítil og létt eða um 20-30 kg.  Hérna fyrir utan húsið þar sem ég bý á Norra Djurgårdslandet hafa fjögur dýr verið að trítla þetta fram og til baka í fæðuleit í morgun.  Datt í hug að skella in mynd af tveimur þeirra. Eins og sjá má hefur snjóað hérna og verður ekkert lát á snjókomunni fyrr en eftir 2 daga.